អាជីវកម្មធុនតូចគឺជាបេះដូងនៃប្រទេសកំពុងអភិវឌ្ឍន៍ ជាអាជីវកម្មដែលងាយស្រួលចាប់ផ្តើម ប៉ុន្តែពិបាករក្សាឲ្យស្ថិតស្ថេររឹងមាំលើទីផ្សារ ប្រសិនបើគេមិនបានគិតឲ្យបានត្រឹមត្រូវអំពីយុទ្ធសាស្ត្រទីផ្សារនិងហិរញ្ញវត្ថុដ៏ច្បាស់លាស់មួយនោះទេ។ តាមបទពិសោធន៍របស់យើងដែលស្ថិតក្នុងអាជីវកម្មធុនតូច និងតាមរយៈការពិភាក្សាជាមួយម្ចាស់អាជីវកម្មជាច្រើន យើងបានរកឃើញកត្តាប្រឈមជាច្រើនដែលអាជីវកម្មធុនតូចជួបប្រទះទាក់ទងនឹងរឿងទីផ្សារ ដែលទាមទារនូវយុទ្ធសាស្ត្រដ៏មានប្រសិទ្ធភាពដើម្បីអភិវឌ្ឍន៍ ផលិតផល/សេវាកម្ម និងអាជីវកម្ម និងដែលជយយដល់ការទាញយកចំណែកទីផ្សារក្នុងព្រះរាជាណាចក្រកម្ពុជា។ សំណួរសំខាន់ៗដែលអាជីវកម្មធុនតូចត្រូវចោទសួររួមមាន៖
1. នរណា ជាអ្នកប្រើប្រាស់សេវកម្មនិងផលិតផលរបស់ពួកគេនាពេលបច្ចុប្បន្ននេះ ហើយនរណាជាអតិថិជនគោលដៅដែលពួកគេគួរផ្តោតលើដើម្បីពង្រីកចំណែកទីផ្សាររបស់ខ្លួន៖ មានន័យថា អាយុ ភេទ ប្រាក់ចំណូល ។ល។
2. នៅទីណានិងនៅពេលណា ដែលអតិថិជនទិញនិងប្រើប្រាស់ផលិតផលឬសេវាកម្មរបស់ពួកគេ ហើយឱកាសណាខ្លះដែលពួកគេអាចចូលទៅដល់អតិថិជនបាន។
3. អ្វី ដែលលើកទឹកចិត្តអតិថិជនឲ្យប្រើប្រាស់ផលិតផលឬសេវាកម្មរបស់ពួកគេ ហើយតើពួកគេអាចទាក់ទាញអតិថិជនថ្មីដោយរបៀបណា?
4. តើពួកគេគួរផ្សព្វផ្សាយផលិតផលឬសេវាកម្ម តាមរបៀបណា ដើម្បីទាក់ទាញអ្នកប្រើប្រាស់បន្ថែមទៀត?
5. តើផលិតផលឬសេវាកម្មរបស់ពួកគេមានសក្តានុពលរីកចម្រើន ត្រឹមកម្រិតណា ហើយតើសក្តានុពលនោះបានមកពីណា បានមកពីការទន្ទ្រានយកអតិថិជនដែលមានស្រាប់ និង/ឬអតិថិជនថ្មី?
ដើម្បីឆ្លើយតបនឹងសំណួរទាំងនេះ អាជីវកម្មធុនតូច ត្រូវស្រាវជ្រាវទីផ្សារដោយប្រើប្រាស់វិធីសាស្ត្រច្រើនយ៉ាង។ អត្ថបទនេះ នឹងលើកឡើងខ្លះៗអំពីវិធីសាស្ត្រទាំងនេះ និងសំណួរជាគន្លឹះមួយចំនួនដែលគួរសួរ។ វិធីនីមួយៗសុទ្ធតែមានតម្លៃ ប៉ុន្តែប្រការសំខាន់គឺត្រូវដឹងអំពីចំនុចខ្សោយរបស់វិធីនីមួយៗ។
1.និយាយជាមួយអតិថិជនរបស់អ្នក –វិធីសាស្ត្រនេះមិនចំណាយអស់ច្រើនទេ។ សំណួរជាគន្លឹះដែលអ្នកគួរសួររួមមាន៖ តើអ្វីដែលធ្វើឲ្យអតិថិជនទិញផលិតផលពីអ្នក មិនទិញពីគូប្រកួតប្រជែងអ្នក? តើអតិថិជនដឹងអំពីផលិតផលអ្នកតាមរបៀបណា? តើពួកគេទំនងជាទិញផលិតផលអ្នកនាពេលអនាគតទៀតទេ? តើអ្នកមានអ្វីលើកទឹកចិត្តឲ្យអតិថិជនផ្តល់ព័ត៌មានទាំងនេះដែរឬទេ ឧទាហរណ៍ដូចជាបញ្ចុះតម្លៃសម្រាប់ទិញទំនិញលើកក្រោយជាដើម។ ចូរប្រាប់ឲ្យពួកគេដឹងថាព័ត៌មានរបស់ពួកគេ ជួយឲ្យអ្នកផ្តល់សេវាឲ្យពួកគេកាន់តែប្រសើរឡើងនាពេលអនាគត។ ការនិយាយជាមួយអតិថិជន ជួយឲ្យអ្នកយល់កាន់តែច្បាស់អំពីតម្រូវការនិងការពេញចិត្តរបស់ពួកគេ និងជួយអ្នកក្នុងការរៀបចំយុទ្ធសាស្ត្ររក្សាទុកពួកគេ និងបង្កើនអត្រាទិញរបស់ពួកគេ។ ចូរចងចាំថា អតិថិជនដែលពេញចិត្តនឹងផលិតផល/សេវាកម្មរបស់អ្នក គឺជាអ្នកជួយផ្សាយពាណិជ្ជកម្មឲ្យអ្នកដោយមិនគិតថ្លៃ។
2. និយាយជាមួយអតិថិជនសក្តានុពលរបស់អ្នក — អតិថិជនសក្តានុពលជាអ្នកដែលមិនទាន់ប្រើប្រាស់ផលិតផលឬសេវាកម្មរបស់អ្នកទេ ឬប្រើប្រាស់ម្តងម្កាល តែជាអ្នកដែលមានបំណងសាកផលិតផលរបស់អ្នកនាពេលអនាគត។ សំណួរជាគន្លឹះមួយចំនួនដែលអ្នកគួរសួររួមមាន៖ តើពួកគេគិតយ៉ាងណាអំពីផលិតផលរបស់អ្នកប្រើប្រៀបធៀបជាមួយផលិតផលិតផលរបស់គូប្រកួតរបស់អ្នក? តើហេតុអ្វីបានជាពួកគេដូរមកប្រើប្រាស់ផលិតផល/សេវាកម្មរបស់អ្នកវិញ? តើពួកគេដឹងអំពីផលិតផលរបស់អ្នកដោយរបៀបណា? លទ្ធផលដែលរកឃើញពីការសួរអតិថិជនសក្តានុពល អាចជួយដល់ម្ចាស់អាជីវកម្មយល់ដឹងអំពីស្ថានភាពផលិតផល/សេវាកម្មរបស់ខ្លួន នៅក្នុងទឹកចិត្តរបស់អតិថិជន ដើម្បីកំណត់ឲ្យដឹងពីចំនុចខ្សោយនិងចំនុចខ្លាំង។ វិធនេះក៏អាចជួយផងដែរដល់ការយល់ដឹងអំពីប្រភេទនៃការលើកទឹកចិត្តដែលគួរប្រើសម្រាប់ទាក់ទាញ់អតិថិជនសក្តានុពលឲ្យប្រើប្រាស់ផលិតផល / សេវាកម្ម ។ល។
3. និយាយជាមួយអ្នកដែលបដិសេធមិនប្រើផលិតផលឬសេវាកម្មអ្នក — ជាអ្នកដែលបដិសេធឬមិនមានបំណងប្រើផលិតផលឬសេវាកម្មរបស់អ្នក។ នេះជាប្រការសំខាន់ដែលអ្នកត្រូវដឹងពីប្រវត្តិនិងទឹកចិត្តរបស់ពួកគេ ដែលឈប់ប្រើ មិនចង់ប្រើ។ សំណួរជាគន្លឹះមួយចំនួនដែលអ្នកគួរចោទសួររួមមាន៖ មូលហេតុអ្វីខ្លះដែលធ្វើឲ្យពួកគេលែងចង់ប្រើឬឈប់ប្រើផលិតផល/សេវាកម្មរបស់អ្នក? ប្រសិនបើចំនុចអវិជ្ជមានទាំងឡាយត្រូវបានដោះស្រាយតើពួកគេចង់ប្រើវិញទេ? វិធីនេះអាចជួយបង្កើតជាយុទ្ធសាស្ត្រទាក់ទាញពួកគេ សូម្បីតែពួកគេមិនដែលដឹងអំពិផលិតផលឬសេវាកម្មរបស់អ្នក ឬមិនទុកចិត្តលើផលិតផលឬសេវាកម្មរបស់អ្នកក៏ដោយ។ នេះក៏ជាប្រការចាំបាច់ដែរ ដែលអ្នកត្រូវនិយាយជាមួយពួកគេ ឲ្យដឹងថាពួកគេធ្លាប់ប្រើផលិតផលអ្នកពីមុនមកទេ ដើម្បីឲ្យអ្នកដឹងថាមូលហេតុអ្វីដែលគេឈប់ប្រើ តើមកពីគុណភាព ថ្លៃ ឬសេវាកម្ម។ល។ សូមចងចាំថាអតិថិជនដែលមិនពេញចិត្ត នឹងនិយាយទៅកាន់មិត្តភក្តិរបស់គេ១០នាក់ទៀតអំពីបទពិសោធន៍អាក្រក់ដែលពួកគេជួបប្រទះជាមួយអ្នក។
វិធីសាស្ត្រប្រមូលទិន្នន័យសម្រាប់ឆ្លើយតបនឹងសំណួរទីផ្សាររបស់អ្នក គឺអាស្រ័យទៅតាមប្រភេទអតិថិជនគោលដៅរបស់អ្នក មានន័យថា តើអតិថិជនគោលដៅជានរណ រស់នៅទីណា ហើយពួកគេទិញផលិតផលពីអ្នកដោយរបៀបណា។ តែទោះបីជាយ៉ាណាក៏ដោយ វិធីសាស្ត្រដែលអ្នកប្រើសម្រាប់សួរសំណួររួមមាន៖ ១. នៅពេលអតិថិជនទិញទំនិញរបស់អ្នក (ប្រសិបើសំណួរចំណាយពេលតិចជាង៥នាទី) ២.ប្រសិនបើអ្នកមានបញ្ជីឈ្មោះអតិថិជន នោះអ្នកអាចទូរស័ព្ទទៅកាន់ពួកគេបាន (សំណួរមិនអាចចំណាយពេលលើសពី១០នាទីទេ) ៣. ទៅលេងផ្ទះអតិថិជនរបស់អ្នកនៅឱកាលល្អណាមួយដែលសមស្របសម្រាប់អតិថិជន (វិធីសាស្ត្រនេះអ្នកអាចសួរបានច្រើនសំណួរ រហូតដល់ទៅ ៣០ ទៅ ៤០ នាទី)៕
អត្ថបទដោយៈ Marketing & Research Training Solutions
ព័ត៌មានលំអិតអំពីអត្ថបទនេះសូមទាក់ទង MRTS តាមរយៈអ៊ីម៉ែល៖ info@mrts-cambodia.com
ប្រែសម្រួលជាភាសាខ្មែរដោយ salarean.com
សាលារៀនដតខម សូមថ្លែងអំណរគុណជាពិសេសចំពោះ ក្រុមហ៊ុន MRTS-Cambodia Ltd
អ្នកដឹកនាំត្រូវមាន សុខភាព សមត្ថភាព និងគុណធម៌ដើម្បីបំពេញតួនាទីជាអ្នកដឹកនាំល្អ។
